2026

Gorliztarren ahotsak Argintxe taberna bete du!

Pasa den ostegunean, bigarren Topakanta ospatu genuen Gorlizeko Argintxe tabernan. Hara iritsi eta espazioa ikusi bezain laster, asmatu genuela konturatu ginen: leku zabala eta egokia halako saio baterako. Hasiera-hasieratik, tabernako langileek erraztasun guztiak eman zizkigun, eta oso lasai ibili ginen mikrofonoei eta gainerako tramankuluei azken ukituak ematen.

Zazpi t'erdiak jotzearekin batera, lehen saioan egondako aurpegi ezagun batzuk ikusi genituen; horrek Ander eta biok asko lasaitu gintuen: Topakanta martxan da! Aurpegi berri asko ere hurbildu ziren, eta horrek bide onetik goazela berresten digu. Gainera, hemendik aurrera eguraldia lagun izango dugula ziur gaude, eta jende gehiago batuko dela gure kantu-jira honetara. Eskerrik asko, Gorliz!

Ordu t’erdi luzez jardun genuen kantuan. Bagenekien gorliztarrak kantuzaleak zirela, baina lehen pertsonan eta aurrez aurre ikustea txundigarria izan zen: a zer-nolako ahotsak! Bejondeizuela!

Gorde hurrengo hitzordua!

Gogoratu, lagunok: datorren apirilaren 16an, arratsaldeko 19:30ean, hurrengo Topakanta egingo dugu (taberna oraindik zehazteke dago). Gorde data, zabaldu egitasmoa zuen ezagun eta lagunen artean, eta goazen denon artean euskara Gorlizen saretzera!

Biba zuek!

__________

Eman izena Whatasapp talde honetan eta ez duzu saio bat ere galduko!

Atzo beste Topakanta bat egin genuen, oraingoan Gorlizen. Gainera, berezia izan zen, Gorlizeko proiektu berriaren lehen saioa izan baitzen. Hemendik aurrera, aurten zehar, Gorlizen ospatuko da hilabete guztietako bigarren ostegunetan, taberna desberdinetan, 19:30etik 21:00etara.

Lehen hitzordua “Portalena” tabernan izan zen, eta ezin dugu aipatu gabe utzi bertako jabeen jarrera: oso jatorrak izan ziren eta erraztasunak baino ez zizkiguten jarri. Halako babesarekin errazagoa da halako egitasmo bat martxan jartzea. Saio hau, gainera, Udalaren eskutik egin ahal izan zen, eta horregatik ere eskerrik beroenak eman nahi dizkiegu.

Gogoratu nahi dugu: Topakanta ez da kontzertu bat. Ez dago oholtzarik, ez dago ikusle eta artista arteko bereizketarik. Aitzakia bat da: euskaraz mintzaleku bat sortzeko, euskarari arnasgune bat emateko eta, jakina, elkarrekin kantatzeko. Parte-hartzea da giltza.

Saioetan abesti sorta bat eramaten dugu, baina bertaratutakoek erabakitzen dute zein kantatu nahi duten. Kantutegia webgune batean dago eskuragarri, eta modu errazean aurki daiteke nahi den abestia, letra guztiarekin, denok batera kantatu ahal izateko.

Lehen saioa izanik, hasieran jendeak ez zekien oso ondo nola funtzionatzen duen Topakantak. Baina saioak aurrera egin ahala, giroa askatzen joan zen, jendea animatzen hasi zen eta, azkenean, oso ondo pasatu genuen denok elkarrekin.

Kantatu genietuen abestien artean Euskal Herrian Euskaraz, Zurekin batera, Matalaz, Aske maite, Eperrak beste honelako beste sorta luze bat. Ederto abestu genuen!

Hurrengo hitzordua martxoaren 12an izango da, betiko lez, 19:30etan, oraindik zehazteke dagoen taberna batean.

Animatu eta zatoz kantura! 🎶

Gorliz Topakantaren inguruan gertatzen diren berri guztietaz jakin nahi duzu? Eman izena Whatasapp talde honetan eta ez duzu saio bat ere galduko! Sartu eta bidali zure sareetara!